本月23號將上演1200米國際二級賽馬會短途錦標，部份參戰馬今日（11日）先參與泥地大閘，既催谷狀態，亦可以作為「前哨戰」，其中「牛精好友」、「喜寶駒」及洪金寶嘅「崇山寶」，就喺第一組1200米泥閘相遇，「崇山寶」日前已由型男杜滿萊過檔，呢朝亦由佢試閘，出試前練馬師姚本輝已經喺機坪傍實，非常緊張，結果「崇山寶」一如過往展示上乘速度，早段帶出好順暢，末段杜滿萊完全冇騎，按住順走跑第三，反而「牛精好友」就受到大力催策勝出。
「崇山寶」雖然輸畀隻「牛」，但姿態明顯較輕鬆，難怪試完返嚟姚本輝笑晒口，睇嚟好滿意隻馬嘅表現。「崇山寶」上仗國慶盃熱倒只得第四，好多人都好失望，但要留意當日佢孭好重磅，相反三甲馬全部超輕磅，落敗當然唔可以作準啦！
另一匹報爭馬會短途錦標嘅「幸福指戰」，今日喺第二組大閘出試，由於嗰組對手較弱，「幸福指數」好easy大勝而回，佢係全港最高分三歲馬，跑落又有進步，絕對係「崇山寶」馬會短途錦標嘅心腹大患！