記得冇耐前講過，練馬師阿Me徐雨石係急先鋒，幾乎每季9月、10月都有好成績，但到咗11月，因為要回氣，成績就大幅滑落，好似前季11月只贏過「綠色快駒」，上季亦只憑「金紫荊」攞一W。今季11月阿Me已有隻「金瀛」勝出，照咁講佢咪「完成目標」，今個月再唔使睇徐廐馬？
咁又未必，起碼阿Me自己就唔信邪，今期佢安排三匹新勝馬列陣，分別係「愛寶」、「四喜滿堂」及「太陽戰士」，睇部署絕對唔係巧合，而係刻意擺下強陣，希望打破馬房11月成績例差嘅魔咒。
先睇「愛寶」，上場配韋達贏四班谷草1200米，一啲都唔吃力，當晚食晒塵嘅亞軍馬「悅欣賞」再出easy win順利補中，就知「愛寶」贏馬一役水準有幾高，今次班次路程配搭不變，再下一城有乜奇？
「四喜滿堂」上仗亦係大勝，隻馬三戰谷草1000米得一冠一亞，今次升班全場最輕磅，如果畀佢再次放出，對手想追到都幾難。而尾場「太陽戰士」已跨季六仗取三冠三位，遲熟馬現階段先大熟大勇，鄭雨滇停賽換級數更高嘅柏寶，抽埋三檔，睇怕阿Me響11月真係唔止贏一場咯！