西京投資主席劉央向來有番咁上下份量，講說話又夠晒豪邁，不過佢始終都係女人，女人多數貪靚，噚日佢出席一個論壇分享點樣做成功女性之後，落台一見到大班傳媒，劈頭就叫攝影師影得佢瘦啲，轉頭又笑住話「我已經減肥了」，證明佢都關注自己嘅磅數㗎。
床上玩百萬元翡翠減壓
劉央噚日出席「財富最具影響力女性」論壇，佢冇喺台上分享減肥心得，但就分享維持20年幸福婚姻嘅三大秘訣，包括第一，一定要生仔（佢有一對仔女），要顯示「其他女人做到嘅嘢我都做到，你（老公）要尊重我」；第二，財政獨立；第三，就係培養自己嘅興趣，此舉減壓之餘又有生活品味。
講到劉央嘅興趣，真係唔係人人學得嚟。除咗打高爾夫球同旅行之外，佢仲鍾意「玩股市」，同埋收藏翡翠。佢早兩年就曾經講過，心煩時，晚上會將幾百萬嘅翡翠攤晒喺床度玩一陣，睇嚟佢收埋唔少好東西。噚日佢嘅打扮相對低調普通，一身黑色衫褲，冇乜首飾，不過佢透露，最近買到啲「好玩兒」嘅翡翠，仲約定下次同華華分享心得㖭呀。
劉央早年曝光率較高，近年因為講親股票都估錯邊，被人叫做「明燈」，佢亦少咗高調公開講股票，不過下周一滬港通開車咁大件事，佢點都要講兩句嘅。
佢話，投資者可以期待下受惠國策嘅健康醫療、軍工國防同環保產業，又預期A股3年會升50%，「明年是Big Year，A股也要起來了」。
至於科技股，佢謙稱自己識好少，騰訊（700）仲可以買吓咁話喎。
李華華
mailto:[email protected]