擊敗紅軍後，車仔已經喺首循環對晒「Big 5」中4位對手，仍以9勝2和不敗的戰績雄據榜首。如果要下注1個月人工，相信冇球迷夠膽包拗頸買車仔贏唔到英超冠軍。
不過，這個世界有「反曼躉」及「反利躉」，如閣下是「反車躉」，你之前或許期待過他們「富不過3代」：希望油王班主阿巴莫域治早日玩厭足球，撤資走人；可惜都不知轉了幾多位領隊，油王依然屹立不倒，仲有大把資金為摩佬（圖）添入法比加斯同「最後一塊拼圖」迪亞高哥斯達。今季冠軍是贏定了，看來往後還陸續有來。「反車躉」想「反車」有望，現只好寄望「摩不過3季」。
性格傲慢難持續
摩佬出道至今，最遲第2季必有冠軍，而且通常第2季輝煌過首季（教波圖、國米第2季贏歐聯；教皇馬第2季贏西甲）；但弊在未必長久，其執教生涯只在車仔及皇馬逗留超過兩季。上回在車仔的第3季，失落英超聯賽冠軍、與油王關係緊張、最終第4季一開鑼便走人；在皇馬第3季，亦因與門將卡斯拿斯等人不和，最終冇冠落袋下黯然離去。
這「摩不過3季」定理，或許跟摩佬傲慢性格有關；又有啲似新加坡政府，要以強勁經濟（成績）去支持高壓管治。萬一出現低潮，軍心開始動搖，危機便會出現。但今次摩佬同油王係「分手後復合」，情形同以前有點不同。如果過埋下季第3季，摩佬同油王依然「甜蜜」，咁「反車躉」睇嚟有排捱喇。
方柏翹
now足球評述員