誰是令擁躉最沮喪的球隊，呢期點都輪到北倫敦雙「黑」，阿仙奴及熱刺，同是天涯淪落人！
格食格，冇得唔信，英超運作廿幾年，好多事情一時三刻好難扭曲，氣勢一過，又好難返番舊時嗰度。巨人費Sir榮休，「魔」氣盡斂，大換血阻不了傷兵咒，好在今季英超除咗車仔，估計又是前、中、後大混戰居多，曼聯入番三甲難度唔算大。利記之前有個入球機器「咬人蘇」，上季氣勁凝聚，勢捧球會史上首次英超冠軍之際，最後卻臨尾香。蘇亞雷斯上季自咬伊雲洛域停賽後，9月杪披甲，上陣頭6場聯賽直至11月國際賽前，入了8球；今季換咗巴神掛帥，後者踢了兩個多月，聯賽仲未開齋，利記踢了11場聯賽輸了5場排第11。前列球隊，季初無厘頭殺出修咸頓，利記可能要好好珍惜今季喺歐聯餘下的參賽日子。一日未見史杜列治復出兼復勇，唔敢再沾「紅」咯！
爭霸來來去去幾隊，但摩連奴回歸西倫敦車仔，注定北倫敦雙雄，評級再降一格；戰績上，摩佬食住雲格，雲格又食番熱刺。雲格主理阿仙奴走到第19個年頭，其間熱刺15次換領隊，今季邀得上季教到修咸頓曉飛的普捷天奴過檔，結果越踢越霉，熱刺同利記在今季第3次國際賽小休前，暫被躋到積分榜下半版（後10位）。投注英超，越無情，真的看得越透，偽名牌熱刺數一數二。這隊波的老闆利維一定是問題核心，但老闆幾差都不會換掉自己；從場上表現，普帥不滿兩大主力基斯甸艾歷臣及艾迪巴約，後防收起維頓漢，重用卡保奧及自己友法斯奧，已見內部問題加劇。一位年輕土炮哈利卡尼冒起，救不了這支季季大變陣的倫敦3哥；如果最後排名，被東倫敦的「槌仔幫」韋斯咸趕過，熱迷在倫敦，企喺邊？
固執雲格如老人癡呆
雲格（圖）的固執，擁躉百般無奈，明明有倫敦最大的主場，最好的訓練設施，有力盡吸世界各地年輕人加盟；可惜場上變陣能力如老人癡呆，再繼04年捧聯賽冠軍遙遙無期。不可能場場用瓣瓣冇嘅蒙利爾客串中堅，哥林張伯斯本是最佳後備人選、未來核心；但後者喺球隊踢右閘緊張兮兮，犯規頻頻。又不敢重用球隊正宗右閘、生牯仔貝拿連。雲老領先後應變遲緩，結果史雲斯落後即刻變陣，用高大的巴菲迪比高美斯，於雨中成功撞散兵工廠防線；轉會窗還有個多月才重開，遠水救不了阿仙奴後防失火。英國越冷，場濕地滑，對付阿仙奴，多用高空波吧！沒有雲格2,000場的頂級教波經驗，對戰準也不會落下風。
英超太激烈，多無強弱之分，上周六尾場加周日4場，結果全部爆冷，啱晒筆者口味；惜總無法狠下心腸押阿仙奴對家，未竟全功。同是天涯淪落人，廠迷、熱迷，在這兩星期國際賽空檔，碰面也不會靦腆。
文：波神
識睇，一定係睇足英台【英波Live】：
http://soccer.appledaily.com
http://bit.ly/engballlive