朗尼嘅第100頂國家隊「喼」帽，唔通要喺個爛場度慶祝？英格蘭國家隊嚟緊星期六會喺溫布萊球場踢歐國外，對斯洛文尼亞，如無意外，隊長朗尼會第100次代表英軍披甲。不過，星期日溫布萊先踢完美式足球，個場爛晒，得嗰6日時間，搞唔搞得番靚啲草呀？
唔似某人覺得體育冇經濟價值，美國人就好識靠體育搵銀，例如NFL會搞海外賽吸客掘金。喺星期日，佢哋安排積遜維爾美洲虎對達拉斯牛仔嘅比賽喺倫敦溫布萊球場度舉行，成8萬幾人入場，政商界人物雲集，星光熠熠；體育界亦有跳水運動員戴利同車路士領隊摩連奴等入場睇波。兩隊踢到飛沙走石，啲草頭、泥頭飛晒出嚟，牛仔最後贏美洲虎31:17。
鶴臣：我哋都唔太高興
8萬幾觀眾睇得開心，但英格蘭領隊鶴臣就越睇越愁，個場俾美式足球踢到咁爛，嚟緊點踢英式足球！星期六，英軍就會喺度迎戰斯洛文尼亞。喺記招上，鶴臣講到場地狀況：「你哋應該唔會期望我話『超靚！做得好！勁開心！』。如果你問我咁係咪好事，我梗係話唔好，但我做唔到任何嘢，而我亦唔會將場地問題當成藉口。我會面對現實，話晒呢場NFL都籌備咗一段日子。球場方面，唔太好彩，唔係最好嘅情況，我哋都唔太高興，但我相信場地職員會喺今個星期六前盡力修復草地。我哋會接受現實，同埋適應佢。」
朗尼百頂喼帽冇癮
英國網民對呢件事嘅睇法都好兩極化，有人插英足總掛住賺錢，漠視嚟緊嘅國家隊比賽，網民Looger話：「錢！錢！錢！呢個足總真係冇鬼用，廢物！」亦有人話鶴臣未踢就賴地爛，英格蘭喺佢帶領下肯定冇前途，網民slothmister話：「唔通斯洛文尼亞唔係同英格蘭喺同一塊草地比賽咩？唔好再搵藉口。」
星期六場歐國外仲係朗尼第100次代表國家隊嘅比賽，如果要喺呢場咁值得紀念嘅比賽踢爛場，相信朗尼都好冇癮。
識睇，一定係睇足英台【英波Live】：
http://soccer.appledaily.com
http://bit.ly/engballlive