一年前，社民連曾浚瑛趁梁振英落區時，向佢怒掟宜家家居出售嘅狼公仔「路姆西（Lufsig）」，令呢隻公仔忽然大賣至一度斷貨，人人都揸住呢隻公仔嚟洩憤自拍呃like，結果宜家嘅瑞典總部不足一個星期將路姆西改名做「路福西」，宜家近日再推出相關公仔嘅推廣活動，幫助不同地方嘅兒童就學，路福西被「除名」，公仔中文名只餘一個字：「狼」。
其實唔單止路姆西，今次所有公仔都係只保留瑞典名，去年嘅中文譯名全被刪走，公仔最多只能「直呼其名」，例如「狼」、「狗」、「貓」等，如果要叫佢個名，最好要識瑞典文。不過，其實Lufsig無論改咗咩名，相信香港人只係會記得佢嘅最初中文名字，就係「路─姆─西」。