湖人周日主場贏咗黃蜂107:92，終於贏到今季嘅第一場勝仗。但係對於非湖人球迷嚟講，喺呢個歷史性時刻最值得關心嘅，應該係NBA名宿巴克利賽後食咩慶祝。
各界抽乾巴克利
湖人開季5場輸晒，創下近57年嚟最差成績，真心球迷痛心批評，而局外人就食住花生抽水，好似巴克利前幾日就喺節目上話湖人未贏到波都唔會食嘢，講完之後湖人就即刻贏波唔使絕食，唔知係咪佢老友米高佐敦放水，點都好，巴克利應該覺得好好彩。
同樣鬆一口氣嘅仲有湖人職球員，教練史葛賽後話，今場贏波大家都冇瘋狂慶祝，返到更衣室都好靜，而自己亦只係同班球員講咗句「OK，贏咗一場」，同完場後喺大量從天而降嘅紫金彩帶下自high嘅主場fans好大對比。
今場波終於有番啲表現，交出21分同7助攻嘅林書豪，賽後喺twitter度感謝主同時亦不忘抽水，補咗句「巴克利可以食嘢」，之後又喺fb上載自拍短片，入面一句「𠵱家要去食飯」，唔知係咪再抽巴克利一次呢？而前鋒艾戴維斯仲寸，話「Charles你呢個肥X𠵱家可以食嘢喇」；網上亦有大量改圖，惡搞巴克利勁食。至於早幾日以「私人服務」激勵湖人今季贏47場嘅AV女莎迪，亦都瘋狂post誘人自拍去「獎勵」班球員。
湖人開齋，但係另一隊加州球隊勇士就終於輸波。同日作客太陽有射手K湯遜因手傷缺陣，勇士最終輸95:107，開季5連勝斷纜，而今季NBA亦再冇不敗球隊。
識睇，一定係睇足英台【英波Live】：
http://soccer.appledaily.com
http://bit.ly/engballlive