好多人話年紀大咗，體能自然下降，但對47歲老將巫斯義嚟講，似乎暫時仍唔適用，剛周日沙田賽事，佢先後勝出「特務飛龍」、「紅旗福將」及「實業風采」，表現比唔少後生仔更有活力，另外「威利加數」若非遇上大勇嘅「包裝鬥士」，阿巫分分贏埋婦女銀袋賽！
本周三夜馬阿巫繼續強勢，座騎好有分量，最值得留意當然係胯下三匹文廐馬，佢同文家良季內合作10次，成績4冠1季，勝出率4成，上名率有一半，數據已話畀你知，佢哋關係有幾密切。呢日（10日）佢哋再次曝露密切關係，開操前佢哋先喺烽火台傾一大輪，之後阿巫親操文廐「惜福」及「摯友無敵」，到咗近收工時，兩個又喺欄邊唔願走，仔細討論戰馬嘅進度同研究戰略，擺到明係搏殺格。
睇番「摯友無敵」，上仗133頂磅下大勝對手兩個馬位，有開竅嘅感覺，今次升班少孭13磅輕鬆好多，排四檔亦比上次好，連捷有乜出奇？至於「惜福」，上次跑第五輸唔遠，趁潘頓停賽阿巫攞嚟騎，仲要排二檔，實唔同你客氣啦。而「智高星」家陣評70分，比贏馬時已低咗9分，既然文家良阿巫咁夾，亦唔好睇低呀！