共產黨嗰種唔准人有獨立意志嘅獨裁思維，喺最近田北俊事件中，完完全全赤裸裸暴露，田少叫689考慮辭職合情合理，竟然招來橫禍，畀大陸撤銷政協常委職務，田少亦因此辭去自由黨黨魁一職。
講真田少大把錢，唔使睇共產黨面色，政協常委呢啲橡皮圖章，做唔做都罷啦，多啲間跑吓馬仔湊吓孫，好過同大話精行騙長官糾纏落去啦！
今期谷草賽事，田少就既可以同個女家庭樂，又隨時有頭馬拉，事關佢千金田啟安隻「盈威勇士」，輸吓輸吓，呢次終於降落四班跑喇，隻馬雖然好耐冇贏過，但今季喺三班三戰，次次只係輸兩個零身位，近態根本唔差，睇部署明顯一心等落到四班先郁手，今次雷神唔放手繼續騎，抽四檔啱晒呢匹均速馬發揮，睇番「盈威勇士」對上兩次跑四班賽，已係去年3月嘅事，結果嗰兩場都彈離對手贏馬，就知道佢喺四班，係幾咁有分量嘅馬！