誓要為肥人爭光嘅鄭欣宜（Joyce），自從停止減肥之後，活得比以前更快樂。冇咗減肥嘅枷鎖，欣宜喺社交網站上，唔再局限貼工作時嘅相片，反而經常見到佢貼唔同類型嘅美食，佢更毫不介懷咁展露食相，實在令唔少愛食但又怕肥嘅藝人大為羨慕！
舉杯賀香香生日
最近忙於籌備新碟嘅欣宜，爭取空檔同朋友聚會，前晚佢喺微博貼圖，原來佢拍完MV之後，就即刻趕返屋企，同《辣警霸王花》一班好姊妹食飯兼為岑麗香提早慶祝生日。
雖然拍攝嗰時曾經傳出一班女仔鬧不和，不過見到欣宜、何佩瑜（Jeana）、岑麗香（香香）和崔碧珈（崔Big瓜）等人實情係friend過打band，頭貼頭舉杯慶祝，但最令人驚訝，原來佢哋啲食量認真驚人，五個女仔叫了三個pizza，同時仲有沙律、意粉同小食，欣宜更貼出擘大口鯨吞美食同伸脷嘅相，自信心爆棚，難怪欣宜留言稱：「愛你們！」Jeana亦寫道：「Super super happy night……Girls talk happy birthday香香。」不少網友見狀叮囑欣宜做世上唯一的你之餘，亦要小心身體，注意飲食。
撰文：馮仁昭
【三個粉絲去首爾】
追星實錄，即上韓劇讀: http://hk.apple.appledaily.com/kstar