唔講唔知，原來11月份係幼稚園報名、面試高峯期，適逢校友會有午餐例會，經呂令意校長安排，請咗一位著名幼稚園校長嚟講吓申請幼稚園嘅情況。到場參加嘅校友有兩類，一類係三十零四十歲嘅校友，一類係早年校友，前者為自己仔女，後者為自己孫兒，都有興趣想聽。
S校長管兩間幼稚園，問吓佢是否中大校友，哦，原來係中大教育碩士，自己親阿哥與自己女兒分別在中大新亞企管系及英文系畢業。佢演講時話，當今家長為兒女搶報幼稚園緊張到極，經常一報就報十幾間幼稚園，試過有二千人報名，形成「恐慌」狀況，但最後得兩三百多學生真係到學校面試，亦有啲學校故意拖慢拖長派表，搞到學校門口有好長嘅人龍，傳咗出去之後，有更多家長湧至，人龍長上加長，其實係學校造勢而已。校長試過有一次在旺區燒味店排隊買叉燒，排極都唔到以為燒味店真係名聞遠近；後面越來越多人，輪到佢之時，先至發覺店內只有一位師傅斬燒味，動作又慢，收錢找錢又慢，唔怪得店外人龍長又長啦。
現在學校一定有form派，網上可下載，到學校攞表一樣得，收埋咁多申請，點樣篩選學生呢？唯有靠面試。校長俾啲貼士，兩歲孩子由父母陪同面試，孩子表現煩躁，取物擲落地下者，好難錄取咯，父母太肉緊，猛咁提場者，又會扣分啫，如果父母唔到，改由祖父母帶孩子去面試，會視為誠意不足，扣分唔眨眼，總之如果孩子有整潔儀容，有禮貌，對簡單問題有回應已經會有幾好分數，不可相信甚麼面試補習，搞甚麼孩子portfolio等等，譬如有幾百孩子嚟面試，人人帶portfolio嚟，老師點會有時間去睇？佢間學校就一概不理甚麼portfolio嘅。如此校長，都幾開通，值得有常識嘅家長鼓掌。有校友問：孩子上午讀國際幼稚園，下午讀學券幼稚園，是否有益。校長話極不鼓勵，如此安排，只會將孩子精神體力透支，令到小孩聽見返學就怕怕，產生厭學心理。而且咯喎，國際學校讀英文與普通話，本地學券幼稚園講廣東話，細細個人仔每日要適應3種語言，未必應付得嚟，父母要花時間在家輔導，否則都係俾小孩子輕鬆啲好咯。