港視未開台，積金局卻已經快人一步搞咗個「積金台」，今年初搵嚟鬼妹仔陳明恩同布偉傑合作拍投資教育短片，據聞收視率不俗，所以積金局搵嚟陳明恩同布偉傑添食，拍咗新一輯合共三套短片，包括《金日閒情》、《金腰帶爭霸戰》同《積金走勢》，由呢對老拍檔再扮鬼扮馬，等大家吸收多啲退休保障心得。
喺《金日閒情》中，陳明恩化身主持講吓強積金嘅入息定義同供款計算方法；《金腰帶爭霸戰》雖以拳賽做故事背景，但陳明恩唔係飾演女拳手，只負責頒發「柑」腰帶畀布偉傑，帶出積金局幫大家積金訊息。想睇扮嘢王陳明恩呢次表現成點，YouTube有得睇嘞。