潮流興自拍，海洋公園都好體貼，喺下月13號正式開幕嘅「海洋公園聖誕全城HO HO HO」，原來會設置聖誕燈飾景區「華麗聖誕燈海」，用數百萬顆環保LED，幻化色彩奪目嘅燈飾，打造全港最大型室內聖誕燈飾展。
八方打探過，燈飾展內除咗會有多個海洋公園標誌性景點，仲整咗幾十隻五彩繽紛嘅動物大使，例如大熊貓、企鵝、海豚、大嘴鳥等，無非係想有齊唔同角度背景俾遊人自拍，用相機留低最閃爍璀璨嘅聖誕回憶。園方同時亦創歷年之最，會喺海濱樂園廣場建造高達70呎嘅超級巨型聖誕樹，會以七彩糖果裝飾為主題，相信係香港今年最高嘅聖誕樹之一咯。