天荒地老流連在摩天輪，兩口子執手相隨，甜蜜中不再畏高。不過，香港摩天輪嘅幸福，又要延期喇。
八方聽聞，因為機電署遲遲未批晒所有牌照文件，搞到之前已經延期到今個月17號先至開幕嘅摩天輪，又再拖到約11月25日，或月底前先開始營運。
不過，有一對疑似新人已經等唔切，噚晚去咗摩天輪下面影婚紗相。咁啱噚晚摩天輪進行試燈，而且同以往小型試燈唔同，係亮着晒所有嘅燈光，打造咗一個有啲脫離現實嘅夢幻美景。
八方好希望機電署咁多位高官，唔該快手少少啦，可能好多新人等住上去，追追趕趕、高高低低，等住幸福處隨時吻到星空㗎。