「萬人迷」碧咸上周先去杭州搵阿里巴巴創辦人馬雲，周六就旋風式現身澳門，幫金沙中國（1928）旗下「四季名店」翻新後嘅開幕儀式做嘉賓。
金沙方面好緊張安排，除咗封咗場內兩條電梯畀碧咸出入之外，仲加派十數名保安維持秩序，連傳媒都唔可以埋到碧咸身，只能遠距離影相。
碧咸舊年11月都去過澳門金沙威尼斯人，今年又做嘉賓，皆因佢係金沙亞洲區代言人，四季名店又係金沙最貴重嘅購物中心之一，剛斥資1億元翻新，於是就搵碧咸去旺一旺個場。
呢日佢一出場就同主持人Sean（謝婷婷男朋友）飲番杯佢有份嘅威士忌品牌，咁識做宣傳，難怪掛靴之後都搵咁多喇。