皇馬贏波，同C朗入波，幾乎係每星期西甲指定發生嘅事情，上周六皇家馬德里憑5名球員各建一功，包括加里夫巴利傷癒復出先開紀錄，以及基斯坦奴朗拿度（C朗）埋齋，以5:1大勝華歷簡奴；皇馬已經聯賽8連勝，C朗亦連續9場聯賽有波入，今場足智彩「讓球主客和」已經開[-3]，「主勝」都照開，下次馬會會唔會開夠[-4]呢？
巴利坐私人飛機夠派頭
皇馬上周中歐聯小勝利物浦1:0，已經喺各項賽事累積12連勝，今次對住華歷簡奴，雖然十三不祥，都依然依絲win；9分鐘巴利已經接應卻奧斯左路傳中近門鏟入，幫皇馬先開紀錄，之後主隊梗係冇留手，上半場完之前沙治奧拉莫斯接應角球大腿撞入，係佢第50個皇馬入球；換邊後卻奧斯、賓施馬先後建功拉開比分，以為C朗入球紀錄就此斷纜？好彩幸運之神幫到手，83分鐘C朗喺左路原本冇咩力度嘅射門，華軍門將基斯甸艾華利斯竟然屙蛋，雖然過程唔係好清脆，但點都係入波，C朗連續9場聯賽入波，今季入球增加至18個，亦淨勝對手4球，啱啱好夠開「主勝」。
大家有冇發覺皇馬入波名單少咗一個大牌球星？就係占士洛迪古斯（J Rod），J Rod呢場都算黑仔喇，交白卷之餘，上半場更加因為一次乏力回傳，俾客軍前鋒貝爾奴單刀建功，一度射成1:2，搞到第2場聯賽正選上陣嘅皇馬門將基羅拿華斯未能保清白身，J Rod應該請拿華斯食飯當陪罪。
C朗𠵱家氣勢咁盛，睇嚟蟬聯金球獎呼聲都好高，巴利亦都好讚同咁講：「以今年嘅表現，唔會有好多人可以同C朗競爭金球獎，我期待佢獲獎；現階段我當然唔及佢，不過我會好好向佢學習，呢個亦都係我加盟皇馬嘅原因。」不過巴利響派頭上都開始力追C朗，上周六比賽結束後，佢就乘坐私人飛機，飛返去威爾斯，爭取休息時間備戰國家隊對比利時嘅歐國盃外圍賽大戰。
阿蘇終取西甲首勝
皇馬贏得輕鬆，巴塞就贏得辛苦，同日作客艾美利亞，主隊前鋒高路沙上半場建功，領先1:0，巴塞苦戰至下半場尾段，先由尼馬及佐迪艾巴各建一功，反勝2:1，終止聯賽兩連敗，亦都係蘇亞雷斯停賽後首場聯賽勝仗，叫做一洗黑腳污名。
識睇，一定係睇足英台【英波Live】：
http://soccer.appledaily.com
http://bit.ly/engballlive