47歲法國老將巫斯義日前雖然失落墨爾本盃，騎夏佳理愛駒「紅色禮物」屈居亞軍，但佢一跑番本地賽事就生猛，今日跑完頭三場已經起孖，近兩次香港賽事執咗五W，年近半百依然寶刀未老。上個禮拜日阿巫幫大摩贏「星爾頓」及「同個夢想」，又替告仔勝出「尊兄」，打造個人今季代表作。到了今戰，頭場先幫文廐「特務飛龍」開齋，第三場則夥拍告東尼的「紅旗福將」一出即勝擊敗亞軍「幸運戰略」，阿巫認真幫到粉絲手！
今場四班1000米直路賽有唔少名人愛駒，最叻只係前大富豪夜總會老闆羅焯嘅「名馬」跑第三，陳慧琳老竇David陳崇偉嘅團體馬「鑽石巨匠」得第四，楊千嬅奶奶黃淑貞嘅「野孩子」跑第八，愛國歌手張明敏嘅「中國動力」最差跑第十。呢日唔見千嬅出現，但老公丁子高及 黃淑貞有露面，「野孩子」另一型男馬主鄭子邦亦有督師，雖然愛駒冇Ｗ冇Ｑ，但丁子高、鄭子邦黑超LOOK嘅吸睛度，就贏晒沙圈其他男士。
講番「紅旗福將」，馬主陳尚仁拉完頭馬趕去機場離港，另一位馬主陳尚智說：「『紅旗福將』是我們一班團體成員和巫斯義一起挑選來港，巫斯義向我們推薦此馬，今仗一出即勝我們很滿意，告東尼表示此馬是短途材料，希望牠保持進度，再交出好成績。」