想多講一句自貿區，上周提到自貿區概念股要揸實，估唔到立即遇上習近平到福建考察，了解平潭島綜合實驗區作為閩台合作視窗嘅成果。市場炒賣自貿區概念延伸至福建區股份，連非常難炒嘅閩港（181）及閩信（222）都一一被炒起，證明自貿區概念會係未來時間內嘅市場主調之一，不可錯失。
𥄫實雙十一概念股
今年光棍節評論大減，可能去年阿里巴巴集團未上市，當時光棍節炒味十足，今年上市任務完成，回歸現實，但太少有關評論，反而提供少許投資空間。阿里巴巴集團於美國上市後，上周公佈第一份季績，市場評論有彈有讚，但投資者嘅行為就很誠實，真錢押注落阿里身上，上周其股價升穿每股100美元後，三個交易日就再升穿110美元，最高見114.77美元，今年雙十一，阿里可輕易創出佳績，但升幅已大，不排除已部份反映，下一支陰燭可視為對該股能否再上的一個測試，短線投機者不妨在下支陰燭落車，等破頂再追。今日我試輕輕講講其他光棍節相關股，睇睇是否有瞄頭。
手機曾經係網購恩物，但內地智能手機股已盛極而衰，去年初，智能手機快速普及，中低收入人士加入換機潮，他們不需要最新或最強嘅功能，反而價錢至上，霎時間千多元嘅智能手機成為大眾最愛。酷派（2369）主攻市場迅速成長，帶動出貨量暴增，推高營運效率，基本面出現「質變」，股價進入幾何級上升軌至去年底。踏入2014年，酷派出現調整，受到新崛起的小米，以及內地電訊商減補貼的左右夾擊，市場當然再次睇淡，能否於光棍節收復失地，實在不敢寄望。
另一個內地電子消費品行業──電視，因今年內地政府取消補貼政策，在整體需求降低下，正被市場唾棄。去年以出貨量計嘅龍頭TCL多媒體（1070），出貨件數達1,720萬台，第二位則為創維（751），出貨1,162萬台。
創維過去五年，每年平均賺約13億元，而TCL則平均蝕1,300萬元。開幅圖出嚟睇，低市值嘅TCL較年初潛了水，而創維則已浮上水面，反映上述說法。明天阿里雙十一，假如創維盤中升穿4.3元，短炒無妨。
此外，去年曾因光棍節熱賣的敏華（1999）、波司登（3998），到目前為止，毫無動靜，賣得好不等於賺大錢現象，表露無遺；要發掘的反而是從未受惠於光棍節的消費股，就像鞋股利信達（738），新登陸天貓，營業額爆升可期，毛利率夠高，只要有銷量，營業額利潤便會一齊來，我相信網購新晉比多年台柱，更易受到光棍節的祝福！
臨交稿前，側聞滬港通快通，先補幾句睇法，我早前評論已表示對今年通車非常樂觀，倉位早有部署，若現在通行，太好了，這兩星期，被無形之手所壓，我在電台節目都有講，似故意示人以弱，現在若手真的放開了，回復正常，應向我早前訂立的目標24300附近進發。
張士佳