唔少人覺得,撐傘嘅女子,特別迷人;若然撐傘嘅女子,係撐緊寫有真普選字樣嘅黃傘,相信格外令香港人傾心。噚日民陣舉辦嘅「撤回人大決議 要求中央對話」遊行,唔少人帶備雨傘同行,佢哋當然唔係將雨傘作為攻擊武器,只不過係一個追求民主嘅象徵啫。而撐傘者中包括三位非常吸睛嘅美少女,加上一致甜美嘅笑容,搶到唔少在場人士嘅目光。佢哋就係經常陪住老竇陳家洛上街遊行嘅三位靚千金囉,連靚師奶陳家洛太太噚日亦有登場,成家人一齊爭普選。呢排忙於佔領運動同議會事務嘅家洛,可以寓遊行於家庭樂咯。