早前無綫職工聯署反暴力行動，有三百多人響應，包括藝人蔡康年和李綺雯。不過蔡康年疑因高層余詠珊發表的「聯署者或遭減人工冇花紅同可能被炒」言論而抽起簽名。前晚蔡康年在慈雲山為保良局盆菜宴擔任司儀，同場還有賭王四太梁安琪、胡楓、尹光等出席。
「唔一定企咁硬」
蔡康年直認曾在facebook簽名，他前晚說：「見到件事嘅發展，我覺得多一事不如少一事，所以聯絡有關同事刪除個名。我全件事都係支持新聞部同事，冇變過，但可用其他方式支持同事。我有打去同新聞部同事解釋，我明白佢哋都係緊守崗位做嘢。」多一事不如少一事意指甚麼？他解釋：「管理層都有講啦，𠵱家件事都未係清楚，所以不如畀大家有啲空間，等佢哋處理，但唔一定要企得咁硬。其實公司管理層同台前幕後都反暴力，故此唔簽名唔代表唔支持。」
「同事好少討論」
蔡康年曾帶老婆和8歲兒子落中環佔領區，是否怕秋後算賬？他說：「唔係。」他表示暫時未有影響工作，但可擔心冇花紅？他說：「我唔知傳聞係咪真，但我相信公司係公道嘅，而且我哋做藝員不嬲都冇花紅。」對於余詠珊的每年5%換血論有何看法？他避忌說：「冇補充。」公司人心惶惶？他說：「呢輪見到同事，都好少討論呢樣嘢。我相信佢哋唔會存在你講呢四隻字。」會否擔心明年是5%之內被裁？他說：「既來之則安之。作為爸爸同主持人，都係做好自己本份。」
採訪：王連連
攝影：陳俊強
【三個粉絲去首爾】
追星實錄，即上韓劇讀: http://hk.apple.appledaily.com/kstar