咩叫食住上，睇型男騎師杜滿萊同練馬師蘇保羅就知，兩人之前場次分別贏咗「搖錢樹」同「駿穎」，到了第六場三班1200米，合作勝出「星航渡」，而杜滿萊更喺第七場莎莎婦女銀袋贏埋「包裝鬥士」。
白鼻帥哥「星航渡」連同今戰跨季三戰兩冠一亞全入Q，上仗四班贏「飛霹靂」馬頸位開齋，今次雖然跑高一班，但叫座力反為仲強，全場冇馬敢落飛，「星航渡」2.6倍由頭到尾都係佢最熱，結果姿態好誇張，出閘緩慢失位唔少，入直路初仍落後一條街，走勢生勾勾唔太規矩，一騎即喺馬群中發癲咁大爆發，幾步間左片右片都贏2.25馬位返嚟，鬥心爆棚，今季兩戰全勝，冧到馬主蒙民德與蒙思穎鬼咁開心！今場二、三名「爆炸糖」同「旅遊仁義」，都係70幾倍大冷門，鞍上人分別係郭能同杜利萊，開歐洲騎師三重彩，熱頭冷腳三重彩派54,126元，結果今期三T正獎冇人中，中頭兩關已經有18萬幾安慰獎收。