韓流效應，推動強國旅客比舊年勁升一成至470萬人。去南韓明洞購物，你會發現好多銷售員都識講一兩句普通話。強國客釋出嘅消費力，唔單止旅遊業受惠，就連韓國化妝股都炒起。
韓劇同k-pop成功俘虜內地粉絲，佢哋唔止追星，仲好鍾意跟足劇集人物嘅造型打扮，買衫、買鞋同買化妝品。直接到南韓入貨，可能仲抵過網購。人民幣兌韓圜過去三個月升值約5%，強國旅客用人仔「鳩嗚」更見使。
全韓最大型嘅化妝公司愛茉莉（Amorepacific）、Sansung Life & Science同Hankook Cosmetics食盡今次韓流。愛茉莉網羅多隻化妝品牌包括雪花秀同伊蒂之屋，股價年頭至今升超過一倍；另外兩間化妝品公司股價升幅仲誇張，分別有三倍同五倍幾。
規模較細嘅Sansung話，公司八成化妝品賣畀強國客，今年首六個月銷售額倍升至287億韓圜，折合有兩億幾港紙，但分析話韓國化妝股升幅快見頂，尤其係細細間嘅化妝品公司。Sansung市盈率年內飆升至390倍，高過首爾綜合指數10.3倍嘅市盈率。
另外，喺南韓上市嘅YG Entertainment今個月推出新嘅化妝品牌moonshot。YG Entertainment旗下藝人Big Bang同2NE1嘅人氣爆晒燈，睇嚟韓國化妝股之後仲有排玩。
C+B
本欄逢周一刊出