第七場莎莎婦女銀袋賽係今期戲肉，馬迷見識到真正高手過招，孫廐「包裝鬥士」贏開二班賽，升呢挑戰呢場本地三級賽，東廐「威利加數」則以前季遮打盃及皇太后盃雙料亞軍身份應戰。結果兩大歐洲高手杜滿萊同巫斯義，拉士鬥到叮噹馬頭表演真功夫，杜滿萊策「包裝鬥士」影相險勝「威利加數」，捧走今屆婦女銀袋賽，由嘉賓兼女星高圓圓手上接過獎盃；連同第五場「搖錢樹」、第六場「星航渡」，杜滿萊直落贏三場兼捧盃，威盡一時。
「包裝鬥士」係潘頓嫡系馬，不過今場評113磅，就算佢唔係停賽都造唔到減，適逢造到磅而又擅長鬥後勁嘅杜滿萊在港客串，幕後一手捉住佢操刀，佢亦交足功課，將「包裝鬥士」嘅凌厲後勁盡情發揮，造就呢匹新勝馬以下犯上，鬥贏直路走外叠蝕位兼內閃及孭多佢九磅嘅「威利加數」，完成在港五捷偉業。今年銀袋日成為歐洲騎練天下，澳洲幫相形見絀，今場柏寶騎李嘉欣愛駒摩廐馬「貳寶」14檔起步，直路飛到最外欄外父咁外，蝕位蝕到阿媽都唔認得，卒之影相飲恨僅得第三，不過摩廐仍能創出連續八屆婦女銀袋賽上名佳績。