一位西醫名叫林傳龍，報紙稱他為「舖王醫生」，私人執業逾二十年，擁有數十個舖位及住宅單位（見星島日報十一月五日A9版報導），呢位醫生名字在過往法庭新聞版出現不只一次，這次因與母親為匯景花園一個物業興訟，林傳龍要求母親交還業權並搬走。爭產之事，法庭聆訊之後，當有裁決。令外人讀者感到驚奇，或不敢相信嘅就係母子在庭上對話，兒子：「你唔值得做我媽咪。」母親話十幾年前經常煑飯俾你食，煮好就送去兒子醫務所，但兒子就話：「好彩天有眼，翻箱倒籠幾經辛苦，搵到1998年嘅午飯及晚飯單據」，證明自己每日買飯食。
原來有人可以咁小心，每次叫完飯食就將單據收埋，16年後仍然可以搵得番嚟做上庭「證據」，左丁山為之服晒，自己每次食完飯找數就會撕爛賬單丟入垃圾桶，幾時會諗到收收埋十幾年，留作後用吖。俗語云「相嗌唔好口」，又云「清官難審家庭事」，但受過高深教育之西醫公開對住阿媽講：「你唔值得做我媽咪」，旁人實在難以入耳，十月懷胎，自出世之日起養到三四歲時（唔講去到十八二十歲咁長咯）、湊仔餵奶換尿片，有時長夜難眠（因嬰兒半夜喊）之辛苦法，幾難形容，等兒女長大成人，佢地開始成為父母之時，先至可以體會幾分。為人母親者，現在半夜起身為嬰兒餵奶，同佢換尿片，會唔會諗到數十年後，會被長大成人之嬰兒鬧自己：「你唔值得做我媽咪呢？」如竟然有此想法，或會將BB擲落地。
退休校長呂令意為香港長者協會籌辦「祖父母日」，左丁山見到佢，笑佢搵苦來辛，退休後唔去遊船河，享清福，做咁多義工，趕嚟校友午餐會，食完午飯轉身已經唔見咗佢，原來又要趕另一個會議。但此日睇到，西醫與母親上法庭互數不是嘅新聞，心有戚戚然，又覺得此時此刻，香港仍然需要有心人如呂令意出力宣揚家庭價值，弘揚孝道。講孝順，當然不必拿出孝經、孔孟之說嚟復古，到咗21世紀，父母與兒女對談，有爭論（譬如佔中反佔中），本屬平常，最主要嘅係爭論之餘，兒女仍然要尊重父母，不可喝駡，或者為咗自己搵錢就不理父母生活，或自己讀完大學（記得父母供書教學）就討厭父母知識不足，談吐不似斯文人！