近年國際監管尺度越收越緊，銀行淨係風險合規都做到氣咳，不過放咗工，大家都係普通人，監管當局同被監管者都有放低角色、輕鬆一齊玩嘅時候。好似財資市場公會（Treasury Market Association，TMA）一年一度嘅周年晚宴，上星期五晚喺灣仔君悅酒店舉行，金管局高層同一眾賓架同炒房阿頭，同台獻唱兼夾Band，全晚出席約500人，賓主盡興。
身兼TMA理事會主席嘅金管局副總裁彭醒棠（Peter），出名係band友兼歌神，表演環節又點少得佢打頭炮呢。Peter同金管局隊band一出場，即化身美國搖滾樂隊Guns N' Roses，自彈自唱演繹《Sweet Child O' Mine》。
馮孝忠陳少平有份唱歌
之後就輪到理事會成員接力，成班賓架原來係譚校長嘅忠實粉絲，佢地呢一晚全部除下西裝褸，一字排開，熱唱譚校長當年hit歌《愛情陷阱》、《捕風的漢子》、《也曾相識》，越唱越投入，認真估佢哋唔到。
財資市場公會行政總裁張泰強當然有份，其他曝光率較高嘅賓架，包括中銀香港投資主管陳少平、恒生銀行（011）執董馮孝忠、思博資本亞太區行政總裁張宗永，同埋花旗香港及澳門區行長盧韋柏，金管局助理總裁李達志雖然企喺大側邊，但就剛好湊夠腳，可以嚟個金管局高層與銀行賓架同台大合唱。
李華華
mailto:[email protected]