上周「老闆惹的禍」的讀者留言，一句到尾一矢中的是這個：「非常真實。實情應該是：Trainee根本不想去食飯而一手策劃的種種藉口。」詳盡分析有這個：「Trainee輕視安排客戶飯局這工作，嫌麻煩，自己又根本唔想去。如果係緊張件事，就不會這樣處理，後來仲要講話「呢啲嘢秘書做」……佢當飯局係「廁所無廁紙」一樣咁小事。而老闆同主管正常以為呢啲濕碎嘢總有人善後，點知所託非人。其實Trainee應該要明白，小事都做不好，永遠都唔會有人安排佢做重要嘢，唔應該睇輕芝麻綠豆工作和細節，更加唔啱嘅係自己打去話cancel就cancel，冇問清楚主管同老闆。」
我之所以會為具爭議性的文章寫多一篇事後檢討，是為了令各位深入了解，明白箇中內情，從而能有更多得着。今次事件，禍源Trainee不想去應酬陪客食飯要OT，想盡辦法找理由方法取消飯局而闖的禍。
要是Trainee不是一直跟開project做招待兼幫手安排行程包括食飯訂枱的話，老闆說不去了，他怎會知道訂枱詳情識得打電話去取消？有讀者認為是：「溝通問題！三方都有責任！老闆：指示不清晰！主管：唔識執生！青衣：唔主動問！」亦有認為：「講到咁緊要，做老闆嘅點可以話唔去？佢唔甩底，就乜事都冇啦！」
老闆之所以是老闆，是他有絕對決定自主話事權，而且如何取捨幾時改變主意，是毋須向任何人解釋的。所以俾指示永遠一句有頭冇尾，做下屬最緊要是話頭醒尾識執生，及主動問明白搞清楚才是。
無論如何，就當是老闆講到唔清唔楚、主管又反應慢唔識睇人用人，工作未做妥丟下不管，在完全沒有交代的情況下自行失蹤放工走人，講到天腳底都講不過，是不能原諒的過錯！
張慧敏
http://www.facebook.com/HKcareerdoctor