上周五「立冬」之後，天氣果然涼咗，大家收埋咗好耐嘅秋冬裝終於可以拎出來着喇。會德豐（020）副主席梁志堅（堅叔）噚日放假落去公司樓盤嘅售樓處巡視時，直情拿拿聲拎番件皮褸出嚟着㖭呀。
堅叔平時多數着西裝，放假改穿皮褸都幾有型，不過噚日涼得嚟都有22、23度，咁快就着皮褸會唔會誇張咗少少呢？唯一解釋，係堅叔都已經76歲，着皮褸保暖啲，唔怕吹親。
會德豐𠵱家賣緊將軍澳一個新樓盤，堅叔放假都落去尖沙嘴售樓處認真賣力。問佢點睇後市，佢當然話樓價好難跌落去喇，因家陣好多後生仔唔願入行起樓，難請人自然令到工人成本居高不下。