今期第三場四班1000米直路賽，有唔少名人愛駒正面交鋒，包括愛國歌手張明敏嘅「中國動力」，前大富豪夜總會老闆羅焯嘅「名馬」，以及楊千嬅奶奶黃淑貞嘅「野孩子」。除咗呢三駒外，在港初出嘅「鑽石巨匠」來頭都唔小，馬主香港鑽石會團體經理人David陳崇偉，咪係另一媽咪級天后歌手陳慧琳老竇囉！David份人好低調，多年來絕少以星爸身份接受訪問，亦未見以個人名義養馬，但團體馬除咗「鑽石巨匠」，仲有現役聖貞德舊生團體嘅「神威福將」，不過「神威福將」暫時未曾上陣，而且日前試大閘更大敗唔及格，距離出頭建功之日，相信仲有一段長時間。
所以David想拉頭馬，現階段只可以靠「鑽石巨匠」，呢隻馬狀態一定OK，上月底試1000米直路大閘，起步被撞兼路程咁短之下，居然仍可贏一條街返嚟，速度高之餘走勢又純熟專注，擺明係超班貨色，加埋同父馬「信心十足」、「四季星」、「勝利寶石」及「美猴王」都一出即勝，有咁嘅數據支持，千嬅愛駒「野孩子」真係巧驚驚喎！