娛樂事業是用口水堆砌，罵、用逆思維想，是一種幫忙。秋生跟王晶的口水戰，帶契電影《大茶飯》這口飯大起來。至於差不多每3年就有兩部電影面世、每次踩界的導演雲翔，自言不怕罵「不過你唔好未睇過戲就鬧」。新作《遊》透析自殺問題依然惹火，拍攝現場則由有自殺經驗的邵音音指導。順帶一提，雲翔的電影當然少不了具象徵意義的裸男、裸女，就如吳宇森的電影會有白鴿一樣。
撰文：何永寧
導演雲翔自08年首部電影《無野之城》面世，差不多每3年就有兩部電影上映，不過每次都有不同問題出現，不是海報被投訴太過露骨，就是過不了電檢處的一關。對上一部《愛很爛》就算被定為三級片，仍有很多地方要修改，前後進出電檢處11次，可算是一項紀錄。
今次新作《遊》反璞歸真，雲翔表示送檢4、5次已經過關，取准影證當日，接待員姐姐連聲恭喜，他說：「一入到去，reception位小姐已經好開心咁同我講『恭喜晒』。今次比較順利，好似巴士燈箱幅裸男都暫時未有人投訴。」沒人鬧未必是好事，被罵也不一定是壞，娛樂圈的消息傳播，多少是靠口耳相傳，雲翔說：「其實我唔介意俾人鬧，因為鬧都係一種noise、一種意見，只要你睇過我嘅戲去鬧，我唔會怕人鬧。好似有啲人話如果你去間餐廳食嘢發覺唔好食，千祈唔好投訴，費事教精佢，成日都講『冇事先係最大嘅懲罰。』」
相反雲翔最討厭戲又沒看，而又指指點點的人：「對付呢啲人我會反唇相擊。或者你唔滿意幅海報，你選擇去塗鴉都冇問題，好過你去禁咗佢，抹煞咗個討論或者表達機會。」
幫助釋放負面情緒
新作《遊》的主題涉及自殺，超脫過往以靈慾為題材的舊作，導演透露故事緣起於拍攝《安非他命》時情緒跌入谷低，他說：「嗰時好灰想過自殺，最後寫咗呢個劇本，電影唔係要標榜死亡或者鼓吹自殺。相反電影畀好有呢樣念頭嘅人睇，話畀佢哋知好多人都有類似問題，唔係你一個係咁，你唔孤獨㗎。有時啲嘢隱藏唔講仲危險，套戲可以幫人釋放出嚟。」電影上映前，雲翔特意邀請香港撒瑪利亞防止自殺會嘅管理層欣賞，最後《遊》被該會選作慈善首映電影：「證明我套片並唔係鼓吹死亡。」而戲中有不少自殺場面，在第二個故事是講述集體自殺，導演跟一班幕後都粉墨登場，拍攝由邵音音指導，他說：「開頭拍極都唔順，音音姐仲話睇到火都嚟話『你哋都死得唔似，胃抽筋唔係咁㗎！』最後場戲音音姐做指導，教我哋食藥自殺應該係點，因為音音姐後生時試過，當然最後死唔去啦。」
文革睇打靶唔識驚
雲翔生於文革年代，小時候就接觸過死亡，他說：「我阿嫲係富農，阿爺係國民黨文化廳廳長，紅衞兵經常嚟屋企鬧阿嫲，不過佢好硬淨亦冇所謂，所以撐得過。當時我住喺廣州北京路，嗰啲被打成『現行反革命』送去刑場都會經過屋企門口，嗰時細個唔識驚，次次都跟去睇熱鬧睇人打靶。」因為這段經歷令他在電影一開始，就有一段講文革及燒毛語錄的故事。
【三個粉絲去首爾】
追星實錄，即上韓劇讀： http://hk.apple.appledaily.com/kstar