近排人人吹捧《相逢可必曾相識》，其實呢首歌好聽根本係常識。話說20幾年前，正值四大天王當道，但某年年尾就俾蔣志光加韋綺姍呢首歌橫掃各大樂壇頒獎禮，威盡一時。之後俾星爺惡搞閩南版更係將首歌嘅知名度進一步提升，不過首歌亦都慘被騎劫，邊位係原唱似乎越嚟越模糊……
球場上其實不嬲有唔少蔣志光，有料但冇fans叫囂，踏實落場，賣力全場，球證唔嗌cut都唔會放軟手腳直到完場。因為佢哋明白專業同受歡迎其實唔成正比，兩者關係係點分分鐘都冇人知，「蔣志光們」知道唯一可以做嘅，就係做好自己，其他嘅，也許不必知道我是誰，無得理亦懶得理。
英超今年堅係有唔少蔣志光，大家原本同是天涯淪落人，點不知一個唔覺意，趁住主角們有時揸吓流攤，佢哋就keep住高水平綠葉質素，結果齊齊做5分鐘主角，光宗耀祖！好似9月英超最佳球員修咸頓嘅加斯安奴柏利（右），球會表現好之後即刻入埋意大利國家隊兼入波，取代埋反斗主角巴神嘅正印地位。雖然係人都知柏利應該只係過客，用嚟畀我哋追捧like一排，直到人氣用盡為止。
又好似10月最佳球員嘅韋斯咸前鋒迪亞法沙高，1年前佢只不過係一位法乙球員，在這傷心者通道上同行，但係機會嘅嘢真係話嚟就嚟；連續6場有波入，但並冇人抬佢上天喎，因為大家都知其實係大牌們未發力箒。韋斯咸呢類綠葉球隊以往查實真係好少靠成績出位，通常要靠啲古怪嘢譬如全裸影相咁，不過今次出賣色相係要提醒大家預防睪丸癌，幾有意思。
香港就唔同，大家發現新大陸蔣志光原來識唱歌時，第一反應係叫佢復出拯救樂壇。嘩！呢種美斯級數嘅問題會唔會heavy咗啲呢？好在蔣志光見慣風浪，輕描淡寫耍咗佢︰無能為力，講完。
修咸頓同韋斯咸究竟季尾可以排得幾高呢，其實好睇4567大天王之後會唔會打番好啲。畢竟綠葉係有綠葉操守，唔應該太搶主角鏡，呢樣係專業嘅其中一項守則，除非係主角們太唔爭氣，令你令你令你再度再度灑淚兒。咁有日如果蔣志光做咗視帝，都唔好太詫異。
KEYMAN
節目主持