【亞洲大學生籃球錦標賽季軍戰】港隊絕殺南韓，歷史性奪得亞洲大學生籃球錦標賽銅牌，勁呀！唔係講笑，噚日喺台北市立大學上演嘅銅牌戰，港隊同南韓鬥成76平手，仲有4.3秒就完場，到南韓開波，點知板凳奇兵蔡再懃精采偷波，喺剩低0.1秒時快攻上籃領先78:76，最後仲幫球隊贏波，籃球生涯首次做絕殺英雄，而南韓就喺3日內兩負港隊。教練譚偉洋大讚港隊贏在「唔放棄」，技術絕唔輸畀亞洲其他球隊。
香港年年都有派隊參加呢個亞大籃球賽，但始終同獎牌無緣，最好成績係06年總排名第4，跟住3屆連4強都入唔到，難怪噚日銅牌戰，絕殺成功後一班球員都忍唔住又攬又跳，開心程度唔比最後冠軍嘅中國遜色！
奇兵蔡再懃成英雄
其實，香港喺分組賽期間曾經爆冷贏過南韓，當時倒戈嘅周健宏仲話佢效力嘅明知大學輸在輕敵；噚日仇人見面，港隊第1節以22:17領先，有備而來嘅南韓好快喺第2節追成39平手，第3節更反超前港隊兩分。第4節展開前，港隊以60:62落後，就係憑住「唔放棄」精神，最後20幾秒打成76平手嘅港隊有控球機會，可惜今場獨取25分嘅陳兆榮被對手偷波打反擊，全靠中鋒劉凱濤成功封阻，皮球輾轉出咗邊線。時間剩番4.3秒，當時南韓有控球權，蔡再懃喺球證吹雞後成功偷波，之後再上籃得手，現場評述員都嘩然：「香港贏在夠韌力，真係無話可說。」
港隊教練譚偉洋賽後大讚得分王陳兆榮、劉凱濤同錢嘉豪，仲有絕殺嘅蔡再懃：「100分有85分，冇滿分係因為個別球員有啲甩漏；最開心係全隊心態好好，因為賽事嘅起伏曾令到佢哋有一段時間懷疑自己，但到最尾階段，大家都咬住，心態正面，最後4秒對方開波都仲有想贏嘅心態，畀到大家成長，真係好開心。」理大生蔡再懃籃球生涯第一次絕殺，佢話：「今次參賽目標係前4，雖然已完成，但4強輸畀中華台北覺得唔甘心，𠵱家創歷史，心裏嘅遺憾感都少咗。」
中國挫中華台北封王
阿洋希望今仗後球員將來可以去CBA或台灣發展：「其實香港年輕球員技術比其他亞洲地方唔輸蝕，但年紀越大差距越大，主要因為香港冇職業聯賽浸淫。」至於冠軍戰方面，中國以94:91擊敗東道主中華台北封王。
識睇，一定係睇足英台【英波Live】：
http://soccer.appledaily.com
http://bit.ly/engballlive