組成3巨頭嘅騎士開季成績唔好，早幾日仲傳出大帝勒邦占士賽後喺更衣室向K艾榮訓話，疑似不和。不過，球隊上周五作客贏金塊110:101，總算暫時止血，逃過3連敗嘅命運。
據美國傳媒報道，騎士上周中大敗畀拓荒者，占士賽後覺得隊波好唔掂，尤其負責控球同做傳送嘅K艾榮，成日單打獨鬥，完全冇盡佢作為playmaker嘅本份。不過，喺上周五對金塊嘅賽前練習時，占士指有關佢同艾榮嘈交嘅報道係流料，仲話明白大家都只係鍾意食花生同抽水，正面嘅新聞係唔會有人報道嘅。結果今場波總算令大帝滿意，全隊總共造出25次助攻，而艾榮亦冇再咁黐波。大帝今場亦以身作則打埋控衞位，個人交出11個助攻；教練布拉達賽後就大讚佢串演控衞超晒班，亦講明喺關鍵時刻個控球權仍然會交畀大帝。
識睇，一定係睇足英台【英波Live】：
http://soccer.appledaily.com
http://bit.ly/engballlive