港慘大褲窿

我叫打工仔，做緊3 sales，住喺第一城，去百佳買餸，入豐澤買電器。為李家賣命時係日頭，睇now TV播英超時係夜晚。我唔敢追女仔，人生唯一希望，就係八號波，點知李氏力場硬係阻頭阻勢。有日，女神突然whatsapp我，「成班舊同學約埋玩board game，你嚟唔嚟啊？」我9秒9衝出門口。「咁遲嘅？玩緊大富翁吖，你中途join都OK嘅。」我望住棋盤，港島、九龍嘅地契全部賣晒，不禁流下男兒淚，「我哋香港人，已經玩到冇癮，唯一動作就係擲骰仔，睇吓用啲血汗錢嚟養肥邊個吸血鬼，點解連玩game都係咁？」

記者：彭海燕、黃碧珊

攝影：梁志永

插畫：東尼電機

Jason Y. NG

•《No City for Slow Men》作者

•《南華早報》專欄作家

玩大富翁，人人都可以白手興家、起樓買地，雖然常說世事如棋，可惜現實始終不是遊戲。本地作家Jason Y. NG表示，大富翁一開始都算公平，玩到最後貧富距離才逐漸拉闊，而且遊戲不設政府，現實當中，政府就應該擔當協調的角色，解決貧富懸殊問題。「香港就好似玩到尾聲嘅大富翁，加上港府太孤寒，冇提供退休保障、失業救濟金，發放福利又怕俾人呃，終令社會分化。」遊戲建基於慾望，眼下的政府也利慾薰心，「政府作為港鐵嘅最大股東，有錢賺嗰陣，唔記得自己係政府，點都保證港鐵獲盡15%盈利。地鐵嘅地產項目賺到盤滿缽滿，都唔使補貼番交通服務，又攞納稅人啲錢嚟起高鐵。」
財團佔地為王，Jason歸咎於香港缺乏民主政制。「如果香港唔落實真普選，政府就無懼選民力量，做咩都得，香港人奈佢唔何！」中央逼四大富豪就雨傘革命表態，富豪如果撤資，可否打破壟斷局面？Jason就對此並不樂觀，「港商走咗，只會換嚟中資進駐。近年中資逐漸滲透香港，以前我幫架車入油，油站多數係蜆殼，現在大多變咗中石化；街上嘅銀行，從前以滙豐、恒生為主，𠵱家多咗中國銀行、交通銀行同農業銀行等等。」紅色資本蔓延，但Jason最擔心的是新聞自由倒退。「比起商業侵蝕，新聞自由嘅蠶食更加嚴峻，你買幾份報紙，除咗《蘋果》同《明報》，其他報紙嘅立場都係親中，可見香港嘅新聞自由倒退不少！」

新華社批評四大富豪沒明確反對佔中，Jason認為若他們因受中央壓力撤出香港，只會換來更多中資企業。

有得揀，誰願意當大集團的棋子？問題是，你意識到自己是棋子嗎？五年前，龐一鳴深感大地產商無良，決意一年「唔幫襯大地產商」。五年過去，龐一鳴早已習慣單車代步，不坐由地產商壟斷的巴士、不光顧兩大超市、不開通電話上網服務。雖然此舉感染了不少身邊人，但對大集團根本沒有絲毫打擊。龐一鳴現居觀塘和樂邨，屋邨樓齡五十年，遠離鬧市，一年前竟然也有百佳進駐。「我好驚訝，一條咁細嘅屋邨，大集團都入侵埋，就知佢哋無孔不入！」
這家「百佳冷凍食品」，店名取巧，除售賣凍肉外，飲品、零食及生活用品等貨物一應俱全。「房署有招租規定，要平均分配店舖用途，邨內已經有兩間士多，唔可以再開士多。百佳好茅，改名做冷凍食品舖頭，但賣嘅貨品同士多一樣，搶咗士多嘅生意。」就記者所見，百佳人頭湧湧，非常旺場，士多則門庭冷清。龐一鳴認為，這與大型超市大賣廣告有關，「廣告效應可以好大，只要建立咗第一聯想，大家見到呢個品牌，就會覺得平啲同有保證。咁對小店嚟講好蝕底，因為小店冇錢賣廣告。」他相信社會應該要有更多選擇，不應由財團壟斷市場，「由年輕人做起，用行動感染屋企人，社會嘅消費模式就有機會慢慢改變！」

龐一鳴

•自由工作者

•就係唔幫襯地產商」發起人

百佳冷凍食品近門口擺放多個凍櫃，但店內跟一般超市無異，龐一鳴懷疑店名是用來逃避房署的出租條件。

和樂邨尚未收入領匯旗下，小士多得以生存，但龐一鳴指百佳冷凍食品進駐後，已搶去士多不少客源。

在新加坡成長的著名財經評論員曾淵滄認為，生意人的最終目標就是賺大錢，不同時期不同地方都有財閥。八十年代末，他移居香港，在當時的香港城市理工學院任教，「嗰時我經常聽到，太古同怡和等英資機構壟斷香港市場。我係外籍職員，學校每年都會畀張來回新加坡嘅機票，仲指定喺太古旅遊訂最貴嘅機票。當時嘅社會怨氣冇𠵱家咁大，97之前，香港仲係英國殖民地，喺太古旅遊訂唔係俾英國人賺晒啲錢咩？唔係官商勾結？」
回歸後，英資在香港的影響力減低，本港的大家族及中資機構抬頭。現時地產、交通、超市、電訊及公共事業等的控制權，均高度集中在超級富豪手上，但曾淵滄卻稱除了電力有壟斷情況，其他範圍也有不少競爭者，沒有全面壟斷。經濟學有80/20法則，即社會上有八成資源被兩成人操縱，曾淵滄表示全球一體化，貧富懸殊的問題只會惡化，「因為社會有唔公平嘅情況，所以先會出現佔領華爾街同香港現時嘅情況。」似乎資本主義或社會主義也解決不了這個全球性問題，現今世代又能否從失敗中參透出合乎大眾利益的新理想主義？

曾淵滄

•著名財經評論員

•香港城市大學管理科學系前副教授

曾淵滄認為除了電力供應外，香港其他產業都有競爭者，沒有明顯壟斷。

賺到盡的遊戲規則，不是人人熱衷。位於西營盤的通泰超級市場，促銷花招不及兩大超市，不會「買豬肉送朱古力」，但東主李廣林自豪地說，通泰價格公道，從不向進口商收取十幾萬上架費。「財團利用市場優勢，貨品唔賣得就退貨，食咗人哋啲上架費，剝削同打擊進口商！」小店價格實惠，6包裝的250ml陽光檸檬茶，盛惠$13.5，平均每包$2.25，就算沒有貼上減價標籤，依然抵買，啱晒low pay一族。
店面空間有限，可是禾稈冚珍珠，有價值$16388的威尼斯干邑，也有甚少在大超市露面的勞工皂、海鷗牌洗髮膏及懷舊零食。接手父業十多年的李豐年說，貨品利潤未必高，只是老人家慣用這些老品牌，如果通泰不賣，他們在別處就找不到了。「只要廠商一日仲生產，我哋一日都賣，如果佢哋都頂唔順，我都冇計！」人性化的經營之道，還體現在散裝米糧之中，「我哋有好多款米，泰國米、越南米，有新有舊，街坊可以將新舊米溝埋，或者溝不同嘅米種，切合自己需要。譬如泰國米溝中國米，中國米較有飯味，泰國米較有飯香，溝埋之後就可以平衡香味同飯味。」
超市開業三十餘年，街坊伴着李豐年長大，看見「隔籬超市汽水平過通泰」，便會向他報料，調整售價，保持競爭力。通泰分店曾經遍佈旺角、北角及中環等地，但由於利潤微薄，難以高薪招聘管理專才，現時只剩西營盤一家還在營業，其他舖位全部放租，業務也以批發為主。新式超市搶走客源，但永遠搶不走老店的人情味。在通泰工作多年的鄭姑娘，大讚老闆有良心，會請員工吃飯、過節提早放工；在附近中學讀書的莊同學，在通泰找到市面罕見的馬來西亞零食，還有九折優待；被大型超市拒諸門外的小狗糖糖，在通泰招搖過市，今日還格外開恩，讓超市職員摸毛毛……如斯溫馨風景，小店限定。

李廣林在超市業內有「糧油大王」之稱，除經營通泰超市做零售生意，還擔當批發商，批貨給小型超市及AEON、UNY等大集團。

店內售賣多款懷舊生活用品，包括藥皂、勞工皂及海鷗牌洗髮膏等，利潤微薄，只為了方便老人家。

通泰超市出售散裝白米，方便街坊按照個人口味混合不同米種。

連鎖超市禁止寵物行走，小店則容許狗仔跟主人購物，店員還跟小狗打成一片。