天氣轉涼，香港前程未卜。馬去羊來，明年香港局勢發展如何？港視開台，電視圈會否掀起另一番局面？周董結婚先定曉明Baby再搞大龍鳳？最當旺、最當黑又是那個生肖？麥玲玲師傅就率先為《蘋果》讀者拆解所有疑問！還有玄學家蘇民峰、李丞責、麥玲玲、區仲德及司徒法正的12生肖羊年運程精讀，且看能否趨吉避凶，運轉乾坤。
撰文：藍文浩、譚倩宜
【娛圈愛侶續癡纏】
王菲與謝霆鋒復合，林峯與吳千語愛得如膠如漆，而黃曉明與Angelababy、周杰倫與昆凌最有望於羊年結婚，究竟四對戀人羊年感情會否開花結果？
林峯千語 結婚時機
林峯同千語差唔多時候喇，後年千語嘅結婚運可以話天合地合，如果16年佢哋唔沖喜就會危機重重，蛇、馬、羊係好適合嘅年份。
霆鋒王菲 波折重重
至於霆鋒本命係有大妻，同年紀大過佢嘅女仔就啱啱好，不過佢哋可能要到猴年先會穩定啲，羊年都有少少波折，到時可能會開花結果，阿菲仲可能再度有喜。
曉明Baby 喜上加喜
黃曉明與Baby的結婚運已在馬年出現，佢哋仲可能已經訂婚或者註冊咗，如果遲啲『正式公佈』就更加好，Baby仲可能有喜。
周董昆凌 衝破關口
至於周董同昆凌，羊年就有好大機會，不過周董唔好開空頭支票喎，唔結的話就可能成為分手年喇。昆凌羊年亦都屬於關口年，不過傾向結果係好嘅。
【電視風雲求突破】
大台收視每下愈況、亞視屢次拖糧又傳賣盤，究竟王維基的香港電視網絡（HKTV）本月19日開台後能否令死寂的香港電視行業掀起新突破新景象？
麥玲玲稱：「羊年以說話搵食嘅藝人、主持、DJ甚至電視台都會辛苦啲，大家都要喺經營唔好嘅困局求突破。現存電視台都會面對困難同人事鬥爭，係辛苦經營、尋求突破嘅年份，過咗羊年先會轉好。王維基屬牛，但係佢身為娛圈中人唔怕羊牛相沖，反而有突破，來年雖然壓力大啲，不過佢做嘅嘢仍然有noise，事半功倍，可以帶到驚喜畀市場。」
談到亞視賣盤，麥玲玲說：「亞視有新資金都未能做到令人關注嘅節目，勢頭依然比較弱。」
【佔中羊年未解決？】
香港自9月底就受佔領事件困擾，政府與佔領者呈膠着狀態。麥玲玲剖析羊年香港運程時說：「每到馬同羊年都會多群眾運動，中國人話『紅羊赤馬』，所以會多學運、社運甚至革命。因為羊係群居，所以好易聚埋一齊，來年群眾中都係有好多聲音，同埋會集結，會係多事嘅一年。」
麥玲玲指香港從來都利金、水，所以到火年就會辛苦一些，她說：「由蛇年開始就係大火年，要到猴年（2016）先會鬆一口氣，無論政治同經濟都會有好嘅走勢。羊年『三碧入中宮』，寫作嘅人，好似同媒體會鬆綁，但係三碧代表鬥爭，政界同有武職嘅人可能會艱辛啲，受是非口舌影響多啲，大家對政府期望同反對嘅聲音依然多，鬥爭、國家間好似貿易戰、經濟戰可能發生，所以羊年唔算係咁穩定，亦都會多波折」。
【三大生肖𥄫到實】
羊犯太歲
踏入本命年的羊人將犯太歲，容易受傷、情緒低落而胡思亂想，尤需注意身體健康。麥玲玲建議羊人今年底驗身、明年初捐血或洗牙有利化解。
虎最當旺
至於羊年十二生肖中，以牛人最當黑，虎人運程最當旺。麥玲玲說：「虎人喺十二生肖就數一數二咁好，工作好順利，財運都唔錯，又有新合作同大突破。不過就要注意落差大，所以見好就要收，記得謹慎行事。」
牛宜沖喜
肖牛者今年變化就會好多，因為牛羊相沖，變化不定。麥玲玲說：「冇吉星照住就代表做乜都要靠自己，亦都多勞少得，仲有可能會得罪權貴，幫過你嘅人容易反目，千萬唔好投資，保守為上，或者以結婚、買樓生BB等都可以沖喜。」
【三個粉絲去首爾】
追星實錄，即上韓劇讀： http://hk.apple.appledaily.com/kstar