先講一單新聞，剛過去嘅曼徹斯特打吡戰，有一張場外照片上傳，畫面為兩人背面，左邊係紅魔曼聯9號，波衫上面叫阿康(HONG)，右邊乃曼城藍衣28號，上面印有KONG，阿康與阿剛，合起嚟剛好就係HONG KONG 928（圖），明晒兼贏晒，雖然阿康阿剛冇正面樣睇，但係團火已經隔空燒到夏愨彌敦怡和街。至於香港嘅球迷，都有班犧牲睇波時間走落去支持學生，我親眼見到幾位阿仙奴躉，見到大家件波衫即時粗口橫飛，就係因為阿記俾安德列治連追3粒逼和，轉頭就約下次睇波，喺好多人互相Unfriend嘅時候，亦有更多嘅友誼出現。
其中有一晚講起世界盃，有人口快快講咗「西德」，呢個咒語同「蘇聯」同「南斯拉夫」一樣，一聽就知你至少30歲。但真係冇辦法，當年1986同1990兩屆嘅西德實在太強，有睇過一定入腦，好多中至老坑球迷，都係呢段時候愛上德仔。當年陣容有馬圖斯、希士拿、布林美、禾拉、奇連士文、列巴斯基，打法實際到位，有星味又長短棍全能，波衫設計仲靚過𠵱家（今屆真係幾核突），有興趣上網睇番，再對照近10年德國隊你就知。
90年世界盃西德冠軍，唔多唔少都因為廿五年前嘅今日，柏林圍牆因為東柏林嘅官方誤會，令到過萬名市民上街，一下子K.O.圍牆，真係好暴力，亦都係違法行為，仲要阻住條街喎，吓話？
梁栢堅
填詞人+彩池人