澳門特首崔世安連任，下月起正式開始第二任、亦係「餘下」五年任期。崔世安正重組新「內閣」，澳門近日流傳大換班名單，多名現任司長陳麗敏、譚伯源、張國華等都冇得留低，新上榜者當中，最矚目係傳會做經濟財政司司長嘅梁維特。
現年52歲嘅梁維特係製衣商人，近年做洗衣生意，喺2008同2012年澳門區人大代表選舉中，都以票王姿態當選，又係澳門行會成員。外界一直傳佢係下任特首人選之一，事關佢根正苗紅，外公陳滿係澳門土共，五十年代擔任澳門新民主運動旗手，有份創辦親共報章《新園地》，有咁嘅背景，如果真係加入政府做官，阿爺栽培佢做下任澳門揸fit人意思都好明顯。據講北京今個月中就會公佈澳門下屆政府主要官員任命名單，梁維特呢匹黑馬係咪順利入閘，屆時有分曉。