著名古董相機拍賣會WestLicht今個月21號同22號喺維也納舉行，拍賣會負責人Peter Coeln帶咗約50部精品嚟香港預展。Peter成日嚟香港，佔領運動對佢影響唔大，對古董相機極有研究嘅佢話，今次其中一部展品好有歷史意義，以史為鑑，值得一看。
「紅旗20」估價60萬元
呢部別具歷史意義嘅相機，就係上海「紅旗20」。根據資料，1969年江青話要「參考」Leica M3做一部國產相機，仲指令生產軍用品嘅上海照相機二廠負責製造，翌年首部機出廠，為慶祝中共建政20年，型號定為「紅旗20」，據講生產少於200部，更加冇公開發售。
以當年大陸經濟、民生狀況，不惜工本製作呢部山寨貨，嗰份即使餓過飢，也要做相機嘅氣魄，絕對遠超𠵱家小米手機撼iPhone嘅程度！今次嚟香港展覽嘅紅旗20，一機三鏡連皮盒，仲有張1977年入口法國嘅證書，十分罕見，估價約60萬元。
古董Leica玩家同八方講，十幾年前喺大陸入手一部紅旗20約1萬蚊港紙，近年升至20至30萬先有交易，最近成交價甚至超過40萬元；老友指呢部山寨機有內地客「追」，勝在有歷史價值，係富起來嘅知青「那些年」回憶。
展覽會其他精品包括瑞士軍用版Leica IIIf，1956年產，可以喺極地環境下使用，估值約60萬港元；另外一部1957年製Leica MP black paint，估價約170萬港元；新貴Leica M百周年版都有展出，據講最新成交價逾50萬元。展覽明日朝11晚7，喺德輔道中33號9樓舉行，查詢電郵：mailto:[email protected]。