聰明人講錯說話，後果可大可小，在美國呢啲樣樣講政治正確嘅國家，一世聰明嘅森馬斯就因為講咗女人冇咁多時間留在實驗室，故此哈佛大學理學院嘅女教授比較少，咁就惹來各方面抨擊，失去哈佛校長職位。九七之前，紅極一時嘅百富勤主席杜輝廉（Philip Tose）對哈佛校友會（Harvard Club）演講，提到美國黑人好耐都冇投票權，引來批評，估唔到如今又有行政會議成員查史美倫講香港特首普選，又提到美國「黑奴」選舉權，搞到事後急急出聲明澄清，如果佢在加州咁樣講，就認真大件事。見得世面多嘅周融，指戴耀廷陳健民兩位佔中發起人回港大中大「復教」，疑似南韓歲月號（現稱世越號）船長跳船，留下佔中學生不理，此言一出，南韓方面當然唔滿意。
更早一啲，梁振英講體育界與宗教界在經濟方面無多大貢獻，兩界一片譁然，體育界反應似乎更大一啲，宗教界就冇乜大反應，任由梁振英講一次「唔好意思」就收貨。左丁山不是體育界，更不是宗教界，只知道宗教界之中，基督教、佛教、道教、「孔教」等領導人都傾向親建制，反對佔中，唔出聲不足為奇。
宗教對經濟有無貢獻，若論實質GDP活動，經濟效益，似乎係少啲，但佛教人士捐獻興建昂坪大佛、志蓮淨苑等景點，對香港文化旅遊大有幫助，有助GDP增長啫；天主教基督教在香港辦學百幾年，聖士提反男女、聖約瑟、男拔、女拔、聖保羅男女、喇沙、港九華仁、英華等等歷年培養高官及商家無數，呢批人對香港GDP嘅貢獻大到極，唔信就問吓曾蔭權、曾俊華、吳光正、梁錦松、田北俊、葉劉淑儀、梁智鴻、李澤鉅等人。宗教對社會經濟建設之最大貢獻在於精神方面，近代無人不識嘅社會學家Max Weber之巨著The Protestant Ethic and the Spirit of Capitalism（1905德文版，1930年另一大師級人物Talcott Parsons譯為英文），就有充份論述基督徒，特別係Calvinists之刻苦工作倫理精神係資本主義壯大發展之要素。亞洲四小龍興起後，亦有學者研究儒家倫理與經濟發展。今年中大崇基與新亞合辦之余英時歷史講座請來中央研究院院士黃進興教授主持兩次講座，第二講就係「論語與算盤：儒家倫理與經濟發展的一個揣測」在十一月九日下午六至八時在銅鑼灣中央圖書館地下舉行，以普通話講述，有興趣者，請勿錯過。