自由黨方剛噚日喺電台節目嘅「特別的歌給特別的人」環節中，點咗首《無言的結局》畀佢老友兼黨友田北俊，方剛叫田少留意歌詞外，仲憑歌寄意同田少講，「乜都唔出聲嘅時候，咁成個香港社會會變成點呢？」但「如果你暢所欲言，講太多嘢之後，又變成一個乜結局呢？」真係千般感慨、萬分欷歔，相信方剛幾唔捨得田少呢位前黨魁。
不過田少就一啲都唔傷感，仲非常幽默，佢先用歌名嘅普通話讀音，同八方講咗個有味笑話，跟住就話其實佢都幾鍾意呢首歌，因為曲調幾好，又自誇識呢首歌耐過方剛㖭啦，然後諗諗吓就話首歌「點畀特首似啲喎」。係咩？呢首歌啱狼振英咩？也許，狼振英已沒有也許。