自從佔領運動後，「四點鐘許sir」就成為唔少網民指定收睇節目，連我求大俠都對許sir金句好似「我重申一次」、「I will now recap in English」耳熟能詳；估唔到英格蘭傳奇前鋒、轉任足球評述員嘅連尼加，周四都有類似金句，歐霸盃分組賽，禾夫斯堡輕取卡斯洛達5:1、出線在望，連尼加就寸尾段連入兩球嘅賓特拿，仲重申呢個唔係講笑。
入兩粒助禾堡大勝
禾夫斯堡暫列德甲次席，周四歐霸盃主場對俄超嘅卡斯洛達，大勝一仗當然唔出奇，較出奇就係入球者。後備入替嘅賓特拿先喺89分鐘射入12碼，補時1分鐘再建一功，梅開二度下，協助禾堡以5:1大勝，亦都係佢加盟禾堡以嚟第1同第2個入球。
花名「中堅賓」嘅賓特拿效力阿仙奴多年，就算轉投德甲球隊都仲好受關注，擔任BBC足球評述員嘅連尼加，就係個人twitter抽中堅賓水，連尼加留言：「Nicklas Bendtner has just scored 2 goals in the last minute for Wolfsburg. This is not a joke. I repeat, this is NOT a joke!」（賓特拿喺最後1分鐘為禾堡連入兩球，呢個唔係笑話，我重覆，呢個唔係笑話。」其實連尼加之前都有唔少出位言論，好似話朗尼永遠及唔上C朗，美斯好唔過馬勒當拿等等，近期插羅渣士對皇馬出弱陣等同拋白毛巾，亦搞到滿城風雨。
抵死反抽「做得好」
不過，遇上同樣玩得嘅中堅賓，一老一嫩都好風趣，賓特拿回應：「great Tweet mate! well done, I repeat, well done.」（好留言，兄弟，做得好，我重覆，做得好）其實26歲嘅賓特拿就唔好自滿住，事關佢喺禾堡仲只係後備，聯賽亦未入波，叠埋心水幫球隊追拜仁好過啦。
禾堡喺歐霸盃H組4戰拎7分，連同得8分、排榜首嘅愛華頓出線形勢都幾好，而經過4輪分組賽後，薩爾斯堡、莫斯科戴拿模、費倫天拿同歷基亞都已經提早出線㖭。
識睇，一定係睇足英台【英波Live】：
http://soccer.appledaily.com
http://bit.ly/engballlive