香港樓巿癲完再癲，無殼蝸牛只有望樓興嘆，真普選問題引起社會兩極化，社會上負面情緒日增。李保樟執導、由黃秋生及蔡卓妍（阿Sa）主演的電影《大茶飯》，以電影反映社會現況問題，控訴地產霸權，秋生日前接受本報專訪時坦言：「有人去爭取，社會先會更好，因為以前唔需要爭取就有，碗飯唔使煮就喺度，可以食，𠵱家冇飯俾你食。」
撰文：張俊銘
《大茶飯》現已上映
在反映社會現實問題的新片《大茶飯》中飾演江湖大佬的黃秋生，深明搵食艱難，帶領旗下一班古惑仔包括吳志雄、陳惠敏等，由經營夜場轉戰至茶餐廳，當中帶出地產商霸權逼遷、業主加租等社會問題。戲中秋生欲追求比自己年輕二十多年的阿Sa，展開一段純情忘年戀，阿Sa笑指吳志雄、陳惠敏做古惑仔大佬，扮相生鬼好笑，但扮演社團大佬的秋生卻指兩人是叔父輩，他自己才是後輩。
談到地產霸權問題，秋生說：「部戲係講香港嘅變遷，成個香港壓力都好重，一啲所謂經濟泡沫同埋經濟發展嘅虛假影像，影響咗一啲腳踏實地、平實過生活嘅老百姓，嗰啲唔係靠炒賣去生存嘅人，係生存唔到。」
「香港人要自己爭取」
秋生指香港社會其實有好多問題：「香港人要自己爭取番自己嘅嘢，乜嘢人就有乜嘢政府，有負面嘅事就有負面嘅聲音，有負面嘅嘢冇理由有正面嘅聲音㗎嘛，我啱啱俾人打劫完，冇理由話爽呀！我喺街俾人揼完，冇理由話正呀！有人去爭取，社會先會更好，因為以前唔需要爭取就有，碗飯唔使煮就喺度，可以食，𠵱家冇飯俾你食，燶晒啦，香港人要自己搵食，自己煮，嗰煲飯係你自己㗎，再唔煮，再蹺埋雙手就等食屎喇。但係爭取，未必一定上街就係爭取，每一個人喺自己嘅崗位都可以爭取。」
秋生指任何人在自己的崗位上也可以發揮及堅持自己的原則，他說：「例如有人要求我喺戲中講兩句愛國嘅說話，我做乜嘢無端端做緊個黑社會戲嘅時候，要我講兩句我愛國嘅嘢，我𠵱家唔係話愛唔愛國係一個問題，事實係冇咁嘅必要加呢啲口號入去部戲囉，咁樣係違反咗我嘅專業操守，呢個時候我就要拒絕，如果我係黑社會，我只會話我愛我大佬，我唔會無端端話我愛國嘅，如果我係一個軍人，可能呢個係合情合理。每個人喺自己崗位做番自己應該做嘅嘢，咁樣就係真正嘅爭取，向不公平嘅東西say no。」
秋生拒當民主鬥士
《大》昨日在內地公映，因為秋生在雨傘革命反暴力和支持學生，有傳中環電影城呼籲觀眾抵制支持佔中的秋生，有網民提議罷睇或者買飛入場高呼「打倒黃秋生」。秋生隨即在facebook回應網民：「有人說要抵制我令我變成全職民主鬥士，可惜的是，就算成功，我也不會跟隨他們的意願變成甚麼甚麽的，民主鬥士從來不在我人生志願之內，我頂多只會變成一個繼續拍電影的舞台藝術工作者，還會寫作及教學。至於舞台工作方面，不用擔心，我有自己的劇團。又說希望看到我氣急敗壞的表情，對不起，暫時令各位失望了，要不，我拍一部全都是氣急敗壞表情的電影，到時再響應影院的號召，（買票）入埸，一齊呼喊打倒地球毁滅者的黃秋生，如何？」另外，《大》片前日在香港上畫，首日的票房收約29萬元，相對同日上映的荷李活電影《星際啟示錄》（Interstellar）都只收162萬元，秋生的《大》算是有交代。
演忘年戀毛管都戙
53歲的秋生又笑指李保樟導演在開拍《大》前向他講解劇本時，給對方嚇了一驚，但仍很樂意與年輕廿多年的阿Sa合作，秋生說：「初初導演同我講話要拍愛情戲，我都打個突，後來先知個故事係講阿伯鍾意咗個𡃁妹，但係追唔到。」身旁的阿Sa即笑道：「咁又未到阿伯。」秋生說：「都阿叔啦！」
談到現實生活發展忘年戀，秋生說：「佢（阿Sa）喺戲入面係廿幾歲，我真係搞唔掂，年齡代表背景、文化背景唔同，溝通唔到。」秋生表示，作為一個阿伯會享受被少女帶到沙灘漫步，但經常重複這樣卻難接受，秋生說：「啲人以為係你個女，我見嗰啲阿伯拖住個廿幾歲，又追又喊，我真係毛管都戙。」
【三個粉絲去首爾】
追星實錄，即上韓劇讀: http://hk.apple.appledaily.com/kstar