民建聯何俊賢前日口快快，話佔領區好易出現伊波拉病毒，之後先改口話唔係伊波拉，應該係類似嘅傳染病，因乜解究咁論盡？可能同就快同女友拉埋天窗有關。噚日佢喺立法會四圍遊蕩，神色緊張，西裝內袋凸出一邊紅色嘅角，經八方一輪盤問後先和盤托出，原來係張寫住「曾鈺成」嘅喜帖。
其實佢同女友拍咗拖三年幾，前排決定今個月尾拉埋天窗，喺元朗筵開30幾席，由於佢屋企人眾多，加上場地所限，唔能夠請太多政界中人，只能請番立法會班黨友、漁農界中人同埋身邊嘅工作夥伴，真係唔好意思喎。既然唔覺意俾八方踢爆咗，何俊賢下定決心，膽粗粗走去大主席間房派帖，事前毫不知情嘅曾鈺成都嚇咗一跳，隨即恭喜準新郎，而民建聯班後生議員，得番陳克勤未結婚，唔知佢使唔使加把勁呢？