喺北京同西環策劃嘅反佔中大龍鳳入面，張融同葉劉可算係最出位嘅兩個人，有泛民中人同八方講，呢兩個人可謂「街上有張融、會內有葉劉」，兩個博出位博領功各有所長：張融最叻亂噏當抹黑；葉劉就成個X-Man入面嘅磁力王上身， 磁力王攝鐵佢就攝位，仲要凡水必抽，連黃之鋒同學聯呢啲「敵人」，葉劉都絕不放過，相當「識食」。
好似葉劉之前藉「有讀者」批評之鋒上《時代》雜誌封面，之鋒係facebook「回敬」葉劉一串葡萄，明寸葉劉唔抵得佢上封面，但葉劉勝在面皮夠厚，俾人寸都可以食住上抽水，佢又係fb回應，話唔係「酸葡萄」之鋒，只係想畀大家一個思考空間，理性辯論選舉制度，仲叫人唔好攻擊「黃同學」云云，真係抽完你水仲要同佢講多謝。
照抽反佔中大聯盟水
除咗抽水叻，葉劉攝位仲叻！好似佢今朝上電台接受訪問，講學聯搵老董做中間人安排上京，其實葉劉只係路人甲一名，竟然咁都俾佢搵到位攝，忽然做咗老董「私人秘書」，話董生工作好忙碌，一年去幾次美國，又成立咗智庫，其實學生都可以搵佢做聯絡人㗎喎！你話葉劉幾好嘢，咁都俾佢攝到位。甚至連傳聞警方可能喺APEC會議結束後對佔領區清場，葉劉一樣唔放過抽水攝位機會，佢噚日無端端喺立法會內會中，提出要喺下星期三大會動議休會辯論，傾保普選反佔中大聯盟籌集簽名行動同埋APEC後清場，雖然俾主席曾鈺成以冇逼切性為由駁回，但睇見佢連張融檔反佔中都照抽水，真係不能不令八方寫個服字！
李八方
mailto:[email protected]