「遮打自修室」每日吸引絡繹不絕嘅學生嚟溫書、做功課，但好多同學仔粗心大意，經常留低手提電腦同手提電話。負責管理自修室嘅副室長Chistie話，每日閒閒哋執到10幾部電話、銀包同手提電腦。佢話學生認為佔領區安全，所以隨處放低貴重物品，有男生甚至連續兩次留低手提電腦，Chistie忍唔住教訓佢，「俾我執到算你好彩！」佢指管理自修室義工自動自覺保管學生、市民留低嘅貴重物品，「見到冇理由唔執起」，但亦有人混水摸魚，執到iPhone 4後唔歸還。自修室為咗令學生唔好咁粗心大意，最近決定訂立新規則，遺失物品嘅學生，要寫「悔過書」先可以攞番失物！