佔領行動今日踏入第42日，唔少佔領區學生捱到樣殘又瘦晒，偏偏幾乎日日去佔鐘嘅肥佬黎，噚日就話近排肥咗10磅，「因為喺度唔可以唔食澱粉質，揀飲擇食冇可能。有人攞飯盒嚟就食，有人攞麥當勞嚟又食，實肥啲喎！」
八方計吓數，佢佔鐘以來平均一日重0.24磅，如果畀佢佔多半年，就肥多44磅，到明年11月頭就重多88磅，你都咪話唔大件事！所以中共要對付肥佬黎，其實唔使出動國家級黑客入侵佢同壹傳媒電腦系統，只要任由佔領繼續，千祈唔好清場，肥佬係咁增磅，一年半載佢肥到走唔郁，就要去全力減磅，邊度仲有精神同時間幕後「指揮」佔領行動！