自從吳飛仙遊都好少接到北美前輩打嚟嘅電話，但上星期收到四眼仔來電，四眼仔出名八通街，又好玩波，攞起電話當然交流吓心得喇。四眼仔話近排愛上咗「角球大細」，由於「角球大細」有走地，所以有時開咗波睇定啲先玩都仲得。
聽佢講到咁有心得，梗係叫佢彈番一兩場過嚟試吓啦；佢話細細哋試吓兩場角球「大」2串1，先嚟星期六第8場嘅利物浦對車路士，10.5球「大」有1.9倍，另外星期六第17場嘅曼聯對水晶宮，11.5球「大」亦有2.02倍，兩場乘埋有3.8倍，比單頭更有吸引力。幾隊強隊攻力都唔錯，底線出波次數又多，曼聯嘅朗尼同利物浦嘅謝老四啲遠距離射波都係球隊攞角球嘅形式，不妨試吓咁話。
四眼仔份人出名八卦，老遠打電話過嚟又點會只係畀料呀？話口未完，即刻問我有冇收到風關於今季由富豪揸旗隊老牌球會係咪好多問題，聽聞班波裏頭幾乎個個都唔順佢，我話講明啲啦。佢話近排入信波總唔派兵俾港隊後，又詐唔知單嘢傳到多倫多，仲有最近又話個訓練員操到個龍門甘得滯，竟然向富豪撒嬌，仲話想炒咗個訓練員，點知冇藉口，結果就搵出訓練員幫港隊單嘢嚟借題發揮，最後搞到港隊少咗個助教操龍門。我話唔係咁冇人情味啩，如果係真就遲早變神枱貓屎，佢話咁遠都收到風，應該都幾堅，信唔信由我喎！
本地職業領隊
耳聽八方 專收好料
識睇，一定係睇足英台【英波Live】：
http://soccer.appledaily.com
http://bit.ly/engballlive