抽水呢家嘢，永遠都唔會夠喉嘅。就好似曾經風光一時嘅湖人，有邊個諗過開季5場竟然全部輸晒。𠵱家做緊NBA評述員嘅名宿巴克利，周四就趕上潮流，抽乾湖人。巴克利喺節目度話，只要湖人一日未贏到波，自己就唔會再食飯喎。
同發言抽水一樣，改圖惡搞亦都係無極限。TNT電視台一班工作人員，就好快手咁製作精美連環圖，幫巴克利預示瘦身過程。湖人喺聽日將會迎戰黃蜂，打完黃蜂之後嘅對手就係近排個勢好勁嘅灰熊，萬一再下一場贏唔到塘鵝、之後再輸埋畀馬刺同勇士嘅話，Sir Charles就會餓到得番一棚骨。
其實，巴克利當時即刻已經想縮沙，話要再諗諗先喎。不過，要走數其實唔難，佢只係話唔食正餐（meal），零食同甜品呢啲都唔計㗎嘛。雖然大家都仲記得佢當年嘅瘋狂「找數真漢子」行為，因為睇死初嚟埗到嘅姚明單場入唔到19分，結果賭輸咗而要錫驢仔嘅屁股，但係對咁鍾意食嘅巴克利嚟講，要忍口應該係不可能嘅任務。
抽湖人水又點只巴克利，連洛杉磯一位AV女星都抽埋一份，呢個叫莎迪（Sadie Santana）嘅女星就話，如果湖人今季埋單有47勝，就免費送每位湖人球員一次服務，咩服務？你懂的！
識睇，一定係睇足英台【英波Live】：
http://soccer.appledaily.com
http://bit.ly/engballlive