上星期，哈囉喂，facebook瘋傳一系列哈囉喂政治人漫畫。
狼振英（Wolf Quake England）、殭融（Ginger Dissolve ed）、女巫孽瘤（Witch Yip Lau）……諷刺時弊，一針見血，大人細路都like爆，風頭直逼MR & LITTLE MISS HK PEOPLE。「我個仔最鍾意嗰隻殭融，話佢額頭道符好搞笑。」家長們都希望小朋友有創意，誰不知創意源自她們最驚的：反叛。
記者：譚偉健
攝影：潘志恆
「創意本身就係反叛，因為有嘢想表達，俾人㩒住冇得講，所以就千方百計都要講。」設計這系列漫畫的梁彤希（Tony Leung）說。千方百計，一字記之曰：橋。壓逼越大，橋越多。
我們的成長，充滿着限制與規條。童年時，父母總教訓說，要畀心機讀書入大學，畢業找份好工，然後結婚生仔，養大個仔，再叫佢畀心機讀書入大學，然後結婚生仔，養大個仔，然後……循環又循環，彷彿延續着一種宿命。Tony是70後，正職設計師，也是在這樣的環境長大，但他卻有不一樣的應對方法，「我自細好鍾意畫公仔，但爸爸見到會鬧，我冇唔開心，總係千方百計畫，書呀簿呀，有空位就畫。」他說。
他非有錢人家出身，童年時住在觀塘翠屏邨，爸爸是巴士站長，很嚴，兩個哥哥規行矩步，爸爸叫讀書就讀書，不敢逾越界線，只有他陽奉陰違，不愛讀書，只愛睇《龍珠》。「嗰時冇錢買，問朋友借，又跟住畫，心裏會想第日做漫畫家都唔錯。」Tony說。
古怪念頭 幫朋友解決難題
他隨遇而安，總覺得甚麼事都有解決方法。18歲，會考只得幾分，無法升學。但塞翁失馬，橫豎要投身社會工作，就找份最想做的：畫連環圖，只是世事不如他所料，「我去文化傳信做學徒，四千蚊月薪。做了幾年，公仔冇畫過幾個，日日就係執稿。」所謂執稿，其實就是主筆用鉛筆起了草稿，用墨水筆勾勒成型，他就負責把鉛筆痕擦去。年復年、日復日，他邊執邊想：「咁唔係辦法，我唔想以後都咁過。」
於是他跑去大一讀設計，一方面希望有張cert傍身，另一方面可以打好基本功。那時有位朋友在年輕人雜誌做編輯，見他愛畫漫畫，請他幫忙在雜誌連載一些漫畫故事。為了找題材，他開始留意身邊的人和事，腦子裏也常常爆出一些古怪念頭。「身邊啲朋友有好多煩惱事解決唔到，我就幫佢哋諗辦法，然後用漫畫方式表達出嚟。」他說。
朋友的難題，千奇百怪，但解決方法，更加離奇，「例如有人洗完頭眼瞓，想唔吹乾頭便睡覺，我就畫個風筒枕頭畀佢，等佢可以一邊瞓覺一邊吹乾頭。」又例如，朋友想和女友分手，卻不知如何開口，他就畫部分手相機給他，「相機中間有個掣，兩個人合照，一撳個掣，張相會切成兩段，咁就係人都知分手啦。」
挑戰權威 哈囉喂萬人like
最後他找了份設計工作，公餘時就畫自己喜歡的東西，「講真，畫公仔未必解決到問題，但笑吓起碼也是種解脫。」他說。
2012年，互聯網社交群組興起，他索性開個facebook專頁，起名「東尼電機」，把畫過的都放上去，甚麼神沙銀包、減肥匙羹、雙眼皮眼鏡，連防踩屎鞋都有。「鞋底中間係個坑，咁咪冇咁易踩到屎囉。」
他的設計在facebook上大受歡迎，積了一班粉絲，年初竟吸引到出版商為他出書，他一口氣畫了兩本，稀奇古怪，風趣幽默，《東尼電機》之名，不脛而走，「書展當日，連媽媽都有嚟捧場，好開心，佢終於認同我。」他說。9月下旬，佔領爆發，催淚彈再激起他的創作慾，反骨遮、手無寸鐵波、佔中褲相繼出爐，人人讚好，而一系列哈囉喂政治人物，也吸引了上萬人like。「抗爭一定會激發創意，挑戰權威吖嘛，你越打壓，創意越多。」
如今創意遍地開花。黃雨傘、黃絲帶、獅子山banner、習總紙板人……家長們費盡金錢、花盡心思送孩子去學創意，殊不知創意原來已在身邊，就看你有沒勇氣讓孩子也反一反。
