作為球迷，當然想所支持嘅球隊場場大勝、踢得精采。不過呢個世界上，又點會咁易出現不敗之師呢？上季利物浦為球迷帶來20多年來最大嘅希望，只差一步就可以稱霸英超，雖然最後失敗，但都令粉絲們相信，球隊今季會更上一層樓，可以再挑戰英超寶座。可惜，當大家開始對利記滿懷希望時，球隊嘅表現又變得唔非常唔穩定。就以今季為例，球隊可以作客炒熱刺，但又可以主場輸畀維拉，高高低低嘅成績，令「十卜」佢哋嘅球迷比以前更加失望。
好似上星期對紐卡素，一班利迷睇到非常眼火爆，因為成場比賽球隊上下都「無段好睇」。齋計射門，全場只得6次，完全失去上季亞軍嘅風範。去到周中歐聯，羅渣士用2隊對撼皇家馬德里，球隊反而有更好嘅表現，證明足球世界真係估你唔到。不過，如果樣樣都可以計算，足球就會失去應有嘅吸引力。
上季被車阻失落英超
講到吸引力，今個星期嘅紅藍大戰，肯定有超強吸引力。因為上季利物浦就係輸畀車路士，令到最後輸兩分俾曼城，唔能夠完成英超冠軍夢。如果利記今場可以復仇成功一雪前恥嘅話，或者可以打出信心，令球隊重新成為爭標分子。雖然我唔係呢兩隊嘅球迷，但我絕對唔會錯過呢場大戰。而我最期待嘅畫面，就係兩隊會為全取3分而大打進攻足球；而我最深愛嘅巴神（圖），我希望佢可以喺今場取得最少1個入球，一洗頹風！至於呢場大戰嘅比數，我估會大手交易，敲兩隊踢成2:2平手！
LULU
不懂踢波愛睇波